自截1080P高清大圖，給主題帖子評分回帖可獲壇幣回饋(評分是不會扣減本身積分)。
黃智雯（英文：Mandy Wong，1982年12月21號—）係香港女演員，曾經參選2007年度香港小姐競選（入圍最後五強），
而家係無綫電視（TVB）嘅經理人合約女藝員，曾經獲得多個人氣女角色同潛質女藝人獎項，喺2018年獲得星馬雙料視后殊榮。
早年生活
黃智雯喺九龍新蒲崗大，讀過聖公會基德小學同文理書院（九龍）佢2002年喺香港演藝學院取得舞蹈文憑，主修音樂劇舞；並喺2007年取得戲劇文憑。畢業後黃智雯曾經喺國泰航空做過3年嘅空姐。佢家姐係英皇教育嘅前補習名師Cathy Wong。
演藝生涯
2008年至2011年：新人出道，啱啱入無綫
2008年，黃智雯被安排入讀第22期無綫電視藝員訓練班，之後開始展開佢嘅演藝生涯。佢初期喺多部劇集之中飾演記者、鄰居、秘書等唔起眼嘅跑龍套角色。2009年，黃智雯喺潘嘉德監製嘅劇集《巴不得爸爸...》中飾演女主角胡杏兒嘅細妹蘇鳳蓮一角而開始為人熟悉，黃智雯喺劇入面嘅「眼鏡妹」造型更加被網民封咗做女神。自此以後黃智雯成為咗監製潘嘉德嘅御用演員。2010年，黃智雯喺時裝劇《搜下留情》中第一次做第三女主角，飾演女主角陳慧珊個懦弱怕事嘅妹妹「鵪鶉妹」鄭笑雯。劇入面黃智雯再次用「眼鏡妹」嘅造型亮相，好受觀眾歡迎，更加被媒體封咗做「宅男女神」。同年，黃智雯同無綫簽約，正式成為咗無綫經理人合約女藝員。 2011年，黃智雯喺《居家兵團》、《怒火街頭》、《潛行狙擊》同《不速之約》之中都擔任幾重要嘅角色，戲份幾重，而且成功入圍《萬千星輝頒獎典禮2011》飛躍進步女藝員，被外界視為大熱人選之一，後嚟個獎由馬賽奪得。
2012年至2015年：演技進步，穩坐二線
2012年，黃智雯喺《缺宅男女》中飾演巴辣人妻婁笑蘭（關二嫂），佢鵲巢鳩佔嘅形象備受矚目，再次令佢受到觀眾歡迎，佢嘅演技亦都被網民盛讚進步咗好多。黃智雯之後喺《On Call 36小時》第一次擔正做第二女主角，飾演見習醫生洪美雪。佢其後喺《飛虎》再次擔正做第二女主角，飾演倔強飛虎蘇文強。之後佢喺《巴不得媽媽...》擔任第三女主角，同兩位經驗豐富嘅前輩級演員黃淑儀同汪明荃合作，佢嘅表現同樣獲得讚賞。黃智雯喺2012年成功攞到《萬千星輝頒獎典禮2012》飛躍進步女藝員同埋入圍最佳女配角（最後兩強）。自此之後，黃智雯就成為無綫力捧花旦之一。
2013年，《女警愛作戰》喺香港地區首播，黃智雯喺劇中飾演一個外冷內熱嘅衝鋒隊督察司徒驕（Madam Kiu）。之後，佢喺《情逆三世緣》中飾演女主角關詠荷個妹妹田秋雁，呢次係佢首次演繹反派角色，呢套劇個監製莊偉建亦都喺媒體面前公開讚佢演得好出色。黃智雯憑《On Call 36小時II》嘅洪美雪一角入圍《萬千星輝頒獎典禮2013》最佳女配角，更加被外界視為大熱之一。2014年，黃智雯喺台慶劇《飛虎II》中再次飾演女飛虎蘇文強呢個角色，並憑住呢套劇入圍《萬千星輝頒獎典禮2014》最佳女配角同第一次入圍最受歡迎電視女角色。
2015年，黃智雯喺時裝劇《師奶MADAM》中飾演熊丹丹。同年，佢喺時裝懸疑劇集《拆局專家》中第一次擔正做第一女主角，飾演冷酷嘅雷蕾，並憑呢套劇首次入圍《萬千星輝頒獎典禮2015》最佳女主角。佢之後喺台慶劇《張保仔》中飾演青樓名妓朱淑君呢個角色。
2016年至而家：晉升一線
2016年，黃智雯喺時裝溫情劇《超能老豆》飾演品性純良嘅諸麗花（花老師），其後喺《律政強人》中挑戰亦正亦邪嘅律師角色方寧（Martha），並憑住呢套劇首次入圍《TVB 馬來西亞星光薈萃頒獎典禮2016》「最喜愛TVB女主角」（最後五強）同獲得「最喜愛TVB電視角色」。同年12月，佢喺劇集《流氓皇帝》飾演吳多茹一角，當中嘅百樂門舞女造型吸引咗唔少網民關注，更加有網民留言表示黃智雯啱做古裝劇多過時裝劇。2017年，黃智雯喺《雜警奇兵》同《降魔的》擔正做第一女主角。佢憑住《雜警奇兵》龍麗莎（Laser姐）呢個角色獲得《星和無線電視大獎2017》「我最愛TVB電視女角色」。同年，佢喺台慶劇《降魔的》同時飾演溫柔熱血嘅急症室醫生莊芷若同千年黑色鼠尾草化身嘅魔（Salvia），演技獲得好評。
2018年，黃智雯擔正做第一女主角嘅時裝劇《三個女人一個「因」》繼《雜警奇兵》後再次被放喺星期日黃金時段播放，黃智雯因為咁而被網民封咗做「星期日女王」。劇入面佢飾演患有三重人格 嘅大律師方以因（Evie），並同時分飾佢嘅次人格菠蘿椰奶（Pina Colada）同第三人格愁擘擘（阿愁）。劇入面三個截然不同嘅人格都被她賦予傳神嘅演繹，由正經內斂嘅主人格，狂野豪邁嘅第二人格，憂鬱膽小嘅第三人格，以至人格模仿另一個人格嘅演繹都恰到好處，令佢嘅演技備受觀眾肯定。TVB更加喺觀眾熱烈要求下，破例喺MyTV SUPER上載20集足本版劇集。呢套劇播之出後，黃智雯獲邀喺第十七屆美國華裔小姐競選總決賽擔任特別嘉賓，主辦單位喺美國紐約時代廣場俗稱「世界第一屏」嘅納斯特克展示屏刊登廣告，令到佢成為史上第一位登上呢個廣告屏嘅TVB藝人。黃智雯喺「萬千星輝賀台慶」以大熱姿態奪得「馬來西亞最喜愛TVB女主角」同「新加坡最喜愛TVB女主角」兩個獎項，成為繼陳展鵬、胡定欣、陳豪同佘詩曼之後第五名同時攞到兩地「雙料」名銜嘅演員。黃智雯亦都喺視評人方以文舉辦嘅《觀眾在民間電視大奬》同視評人游大東舉辦嘅《香港電視大獎》中攞到「民選最佳女主角」，成為觀眾投票選出嘅雙料「民選視后」。黃智雯亦都憑住劇集《三個女人一個「因」》喺《萬千星輝頒獎典禮2018》入圍「最佳女主角」同「最受歡迎電視女角色」最後五強，但最終未能獲獎。
2019年，黃智雯第一次一個人主持真人show節目《一個因去跳舞》。佢喺節目中由零開始學做韓國女團成員，拍攝期間更加因為訓練密集、欠缺休息而病咗，需入院打針，佢認真同敬業嘅態度獲觀眾稱讚。同年，黃智雯喺劇集《街坊財爺》中飾演幫手解決貴利問題嘅社工朱瑪莉，同前輩鄭則仕、苑瓊丹、黎諾懿同埋邵美琪合作演出。
2020年，黃智雯喺時裝懸疑劇《十八年後的終極告白》飾演重案組督察阮麗瑾，劇集氣氛好沉重，加上角色經歷咗一啲悲慘變故，令到佢喺拍完之後用咗接近半年時間抽離情緒。同年，佢喺時裝奇幻喜劇《降魔的2.0》中再一次飾演溫婉善良嘅醫生莊芷若，當中芷若借咗肉身俾鬼魂啤啤同馬季約會嘅一幕，黃智雯成功演繹到啤啤嘅神韻，演技得到唔少網民稱讚。而《十八年後的終極告白》同《降魔的2.0》有兩個星期都係喺翡翠台兩個黃金時段緊接住播出，係佢第一次有主演嘅劇集同期疊播。同年11月，黃智雯喺台慶劇《使徒行者3》飾演有學者症候群嘅CIB總督察章紀孜（Madam G）。除咗電視劇演出之外，佢仲喺1月第一次演出舞台劇《今晚打老虎》（共6場），飾演才女王秀英呢個角色。
|
